Депутат жер шетелдіктерге сатылады деген қауесетке жауап берді

Мәжіліс депутаты Бақытжан Базарбек жердің шетелдіктерге сатылатынын жоққа шығарды, деп хабарлайды Orda.kz.

Базарбек әлеуметтік желілерде жаңа Конституция жерді шетел азаматтарына сатуға рұқсат беретіні жайлы тараған ақпаратқа қатысты пікір білдірді.

«Бұл —  өтірік, әдейі жасалған дезинформация. Қолданыстағы Конституция жобасында жерді сатуға рұқсат беретін немесе қандай да бір тыйымды алып тастайтын бірде-бір норма жоқ. Оның үстіне, Конституцияның алтыншы бабының қолданыстағы редакциясы өзгеріссіз  Конституцияның сегізінші бабының негізіне алынған. Нақтылық үшін осы норманы оқып бергім келеді: жер және оның қойнауы, сулар, өсімдіктер мен жануарлар дүниесі, басқа да табиғи ресурстар халыққа тиесілі. Халық атынан меншік құқығын мемлекет жүзеге асырады, ал жер заңда белгіленген негіздерде, шарттар мен шектерде жеке меншікте де болуы мүмкін. Сондықтан жерді жаппай сату туралы барлық әңгімелер — не құқықтық сауатсыздық, не әдейі жасалған манипуляция», — деді Базарбек.

Еске сала кетейік, Алматы қаласында құқыққорғаушы Бақытжан Төреғожинаның бастауымен баспасөз-мәслихаты өтті. Аталмыш жиында Қазақстанның әр аймағынан құқыққорғаушылар жиналып, өңірлерде болып жатқан мәселелерді қалай көтеріп жатқандарын, қандай мәселе шешілді, қандай мәселе әлі шешімін таба алмай жатқандығы туралы БАҚ өкілдеріне мәлімдеді.