Батыс Қазақстанда еріген қар суы тас жолды шайып кетті

Еріген қар суының басуына байланысты жол көлік қозғалысына жабылды. Оқиға орнында құтқарушылар мен полицейлер кезекшілік етуде, деп хабарлайды Orda.kz тілшісі.

Өңірде биылғы қыс өте құбылмалы. Бірде қатты аяз болып, ауа температурасы нөлден төмендесе, аяқ астынан жаңбыр жауып, жылымық ауа келеді.  Оқиға 8 ақпанда болған.

Толассыз жауған жаңбыр мен жылымық ауа қардың қарқынды еруіне себеп болды. Ал 9 ақпан күні еріген судың көп жиналып қалғаны сонша, ол Жаңғала ауданы, Мәштексай ауылынан екі шақырым жердегі Чапаев – Жаңғала – Сайхин тас жолына жайылды.

Жиналған судың ені 55 метр, тереңдігі 25 см-ге жетті.

«Көлік қозғалысы уақытша тоқтатылды, айналма жолдар бар, елді мекендерге қауіп төніп тұрған жоқ. Зардап шеккендер жоқ»  деп хабарлады Батыс Қазақстан Төтенше жағдайлар департаменті. 

Қазір оқиға орнында құтқарушылар, полиция және жергілікті әкімдік қызметкерлері кезекшілік етуде. Жол құрылыс компаниясы жолды нығайтуға кірісті.