Атырауда прокурор салық қызметкерінің басынан ұрып, комаға түсірді

Атырауда көлік прокуратурасының қызметкерлері мен облыстық мемлекеттік кірістер департаментінің басшылығы арасында төбелес болды, деп хабарлайды Orda.kz.

Оқиға кеше Атырауда Назарбаев мектебінің жанында орналасқан бір мейрамханада болды. Куәгерлердің айтуынша, олар бірігіп арақ ішіп, сөзге келіспей қалып, соңы төбелеске ұласқан. Қақтығыс барысында мемлекеттік кірістер департаменті басшысының орынбасары басына соққы алды. Салдарынан салық қызметкері ауыр халде ауруханаға жеткізіліп, комаға түсті.

Белгілі болғандай, қылмыстық кодексінің 106-бабы, яғни «Денсаулыққа қасақана ауыр зиян келтіру» бойынша тергеу басталды.

Orda.kz тілшісі Атырау облысы Полиция департаменті мен Денсаулық сақтау басқармасына пікір алу үшін хабарласты, бірақ мақала жарияланған кезде жауап алынған жоқ.