Атырау облысында су тасқыны салдарымен күрескен құтқарушылар үйлеріне оралуда

Үш айдан астам уақыт бойы құтқарушылар су тасқыны зардаптарын жоюға атсалысты. Бүгін оларды салтанатты жағдайда үйлеріне шығарып салды, деп хабарлайды Orda.kz. 

Бұл – Қазақстан Республикасы Төтенше жағдайлар министрлігінің Шымкент, Ақтөбе, Маңғыстау, Түркістан, Қызылорда облыстарынан келген топтары және Төтенше жағдайлар министрлігі, Қорғаныс министрлігі мен Ұлттық ұланның 52 859 әскери бөлімінің әскери қызметшілері.

Құтқарушылар 485 мыңнан астам адам тұратын 483 ауылды, 118 мыңнан астам үйді қорғай алды. Бір ғана Атырау облысында орнатылған қорғаныш бөгеттерінің арқасында 20 мыңнан астам адам тұратын 14 елді мекенді су басудың алдын алуға мүмкіндік туды.

«Министрліктің материалдық-техникалық базасы жаңартылып, арнайы техникамен, тікұшақтармен, ұшақтармен толықтырылады... Жергілікті әкімдіктер қорғаныс бөгеттерін салуға қажетті құрал-жабдықтар берді. Олар зардап шеккендерді жедел эвакуациялау пункттерін құрды», - деді Төтенше жағдайлар министрі Шыңғыс Әрінов.

Тұрғындарды эвакуациялауда «Қазавиақұтқару», Қорғаныс министрлігі, Ұлттық қауіпсіздік комитеті және Ұлттық ұлан ұшқыштарының үлесі зор екені аталды.

Басқарма басшысы азаматтық қорғау сержанты Рақым Бейбарыс Жалғасбайұлы мен азаматтық қорғау прапорщигі Балданов Бекжан Қуанышұлының туған-туыстарына көңіл айтты. Қаза тапқан құтқарушыларды бір минут үнсіздікпен еске алды. 

«Әрине, су тасқынымен күрестің негізгі ауыртпалығы өз міндеттерін абыроймен атқарған құтқарушыларымызға түсті. Өкінішке қарай, қызметкерлеріміздің арасында да шығын бар. Бұл олардың отбасы мен министрлік үшін орны толмас қаза», - деді Төтенше жағдайлар министрі өз сөзінде