Ардақ Назаров Мәжілісте анасын туған күнімен құттықтады

Мәжіліс депутаты Ардақ Назаров ресми отырыс кезінде анасын туған күнімен құттықтады, деп хабарлайды Orda.kz.

Парламент отырысында сауал жолдамас бұрын, Назаров алдымен анасын 70 жасқа толуымен құттықтауды жөн көрді. Анасына деген жүрекжарды лебізін ол парламент мінберінен жария етті.

«Қадірлі анашым. Сізді туған күніңізбен шын жүректен құттықтаймын. Сіздің мейірімге толы жүрегіңізге және жүзіңізден төгілген нұрыңызға шомылып өстім. Әкетайым екеуіңіз құстың қос қанатындай мәңгі бірге болып, құдай бере салған немерелеріңіздің қызығын көріңіздер. Анашым, мен сізді жақсы көремін. Сіздің алдыңызда басымды иемін», – деді Назаров.

Депутаттың құттықтауына әріптестері қол шапалақтап қолдау көрсетті. Дегенмен, парламент қабырғаларында мұндай әрекет қаншалықты орынды деген сұрақ туындайды.