Алпауыт инвестор Қазақстанға жаңа зауыт салудан бас тартты

Алматы облысында америкалық компанияның қатысуымен салынбақшы болған суару жүйелерін өндіретін зауыт енді салынбайды. Инвестор жобаны жүзеге асырудан бас тартты.

Бұл туралы Orda.kz хабарлады.

2021 жылдың қазан айында Қазақстан үкіметі Valley Kusto GB BV компаниясымен — америкалық Valmont корпорациясы бөлімшесімен инвестициялық келісімді жүзеге асыру туралы қаулы шығарды.

Келісімге қарасақ, шетелдік инвестор Алматы облысында Valley брендімен суару жабдықтарын өндіретін зауыт салуы тиіс еді. Өндіріс қуаты жылына мың машинаға жетуі керек болатын. Жаңа зауыт Оңтүстік Қазақстанда егін алқаптарын суаруға байланысты мәселелерді шешуге көмектеседі деп жоспарланған. Бұл қант қызылшасы егістігін көбейтуге және отандық қант өндірісі мәселесін ішінара шешуге мүмкіндік берер еді. Бірақ жобадан үш жылға жуық уақыт бойы ешқандай хабар болмады.

12 тамызда үкімет премьер-министр Олжас Бектеновтің қолы қойылған қаулы  шығарды. Ол қаулыда инвестициялық келісімнің күшін жойғаны анық жазылған.

Orda.kz редакциясы шетелдік инвестормен келісімшарттың не себепті бұзылғанын анықтау үшін Ауыл шаруашылығы министрлігіне хабарласты. Министрлік бізге америкалық корпорацияның өзі жобаны жүзеге асырудан бас тартқанын айтты.

«Valmont компаниясынан шартты екі тараптың келісімі бойынша бұзу туралы хат келді. Қазақстан үкіметі Valley Kusto GB BV компаниясымен келісімді бұзды»,  деп түсіндірді ведомство.

Министрлік жобаның тек қағаз жүзінде қалғанын атап өтті. Америкалық компанияның орнына қазақстандық егістік алқаптарын құрғақшылықтан құтқаратын басқа инвесторлар болады. Ауыл шаруашылығы министрлігі «Kazakh Invest» АҚ-мен бірге заманауи суару машиналарын өндіретін екі жобаны жүзеге асырады.

«Қытайлық Vodar компаниясымен бірге Жамбыл облысындағы «Тараз химия паркі» АЭА аумағында зауыт салу жобасы жүзеге асырылып жатыр. Жобаның құны — 50 миллион доллар»,  деп атап өтті Ауыл шаруашылығы министрлігі.

Тағы бір суару жүйелерін өндіретін кәсіпорынды түрік инвесторы AFKO салуға ниет білдіріп отыр. Бірақ, қытай жобасына қарағанда, түрік жобасы әлі келісім кезеңінде ғана тұр. Зауыт жылына 500 машина өндіретін қуатпен Атырау облысында салынады деп жоспарланып жатыр. Дегенмен, келіссөздер әлі де жалғасып жатыр.