Алматыдағы 3 күн бұрын тұтанған өрт әлі тоқтамады

Алматыда үш күннен бері қоқыс полигоны өртеніп жатыр. ТЖМ өртті сөндірудегі негізгі қиындық 10 метрге дейін созылған өрт ошақтар мен құбылмалы жел екенін атап өтті, деп хабарлайды Orda.kz. 

Өрт 15 қыркүйек күні Алатау қаласы Әли ауылының маңында басталды.

ТЖМ мәліметінше, оқиға орнында штаб құрылып, 200-ден астам адам мен 90 техника жұмыс істеп жатыр. Тіпті өртті сөндіруге Алматы, Шымкент қалаларының, Жетісу, Абай, Қарағанды, Түркістан және Жамбыл облыстарының ТЖМ күштері, сондай-ақ екі әскери бөлімнің әскери қызметшілері тартылды. 

Өрт аумағын сөндіру үшін Тереңқара өзенінен су үздіксіз жеткізіліп отыр. Ол үшін магистраль сызығы бар арнайы сорғы машинасы да қолданылып жатыр.

Айта кетейік, Алматы қаласы Әуезов ауданындағы Аманжол көшесінде нөсер салдарынан жол опырылды. 13 көлік зақымданды.