Алматыда меценаттар болашақ мұғалімдерге жатақхана салып берді

Студенттер үйі 1 миллиард 350 миллион теңгеге салынғаны мәлім болды, деп хабарлайды Orda.kz.       

Алматыда Жароков-Дунаев көшелерінің қиылысында қараусыз қалған ғимарат орнында ауданы 2 мың шаршы метр болатын жаңа студенттер үйі салынды. Онда 200 адамға дейін сияды. Қала әкімдігінің баспасөз қызметінің хабарлауынша жатақхана халықаралық стандартқа сай салынған. Мұнда тұрғындар үшін барлық жағдай жасалған: коворкинг орталығы, конференц-зал, оқу бөлмесі, үлкен шатырлы террассалар.

Жобаның құны 1 миллиард 350 миллион теңге. Оны құрамында 50-ден астам компания мен меценаттар бар Mugalim қоғамдық бірлестігі жүзеге асырды. Олардың қатарында Karazhal operating, Rise capital, Daco Motors KZ, San tires, Pine education, Kazintel group компаниялары бар.

Жатақхана Абай атындағы Қазақ ұлттық педагогикалық университеті, Қазақ ұлттық қыздар педагогикалық университеті, Қазақ ұлттық университеті, С.Демирел атындағы университет және сол сияқты жоғары оқу орындарының педагогикалық мамандықтары студенттеріне арналған.

«Mugalim» қоғамдық ұйымы өкілдерінің айтуынша, жыл соңына дейін қоғамдық бірлестік меценаты Zhibek Dorm серіктестігі тағы 100 орындық жатақхана салуды жоспарлап отыр. Сондай-ақ, «Mugalim» бірлестігі 110 орындық студенттер үйі мен  135 орындық жатақхана ашуды жоспарлап отыр.