Алматыда бір топ әйел зейнет жасына байланысты митинг өткізді

cover

Алматыда әйелдердің зейнет жасын 58 жасқа төмендету ұсынысын айтып, бес әйел жиналды. Айтылған уақытынан сәл кешігіп келген әйелдер ақ оралмалдарын тағып, қолдарына плакаттарын алып өз талаптарын айта бастады.

Белсенділер Республика Сарайының алдына жиналды. Митингке қатысушылар «зейнетке шығу жасын 58-ден асырмай, бұрынғы талапты қайтаруды сұрады!», «Қазақстан Республикасы Тәуелсіздігінің 30 жылдығы құрметіне әйелдерге рақымшылық жариялансын!» деген ұсыныстарын білдірді.

Фото: Orda.kz

Біраз уақыттан соң акцияның болып жатқанын көрген бір әйел адам келіп бестіктің жанына қосылды. Ол өзінің мұғалім болып істеп, жұмыстан қысқарып қалғанын, қазіргі таңда еш жерге жұмысқа тұра алмай жүргенін айтты.

Митингке Алматы қаласының әкімдігі рұқсат бермеген. Жиналғандардың айтуынша, сол себепті де митингке аз адам келген. Дегенмен көше бойында кетіп бара жатқан жандар олардың осы әрекеттеріне қолдау білдіріп жатты.

- Зейнетке шығу жасын 58-ден асырмауды талап етеміз. Бізді көбісі қолдайды. Өтініш бойынша 54 мың қол жинадық, — деді белсенділер.

Митингіге әкімдік өкілі келіп, митингтің заңсыз екенін, сондықтан плакаттарды жинап, тарау керектігін айтты. Белсенділер өздерінің азаматтық құқықтары туралы жауап берді.

Бек Байтас, Жандос Мәдениет

Жаңалықтар

барлық жаңалықтар