Алматы құрылыс бақылау басқармасы заңсыз лицензия таратқан: қылмыстық схема әшкере болды

Алматы әкімдігі қызметкерлерінің қатысуымен болған «лицензияларды заңсыз тарату» бойынша қылмыстық схеманы Қаржылық монитринг агенттігі әшкереледі, деп хабарлайды  Orda.kz.      

Ведомство мәліметінше, 2021 жылдан бастап қылмыстық схемаға қатысушылар Алматы қаласы «Қалалық құрылыс бақылау басқармасы» КММ қызметкерлерімен сөз байласып, өздеріне қарасты компаниялар арқылы өндірістік базалардың, арнайы техниканың және білікті инженерлік-техникалық мамандардың бар екені туралы жалған деректер ұсынған.

Алайда іс жүзінде белгіленген талаптарға сәйкестік болмаған.

Тергеу деректеріне сәйкес, мұндай «қызметтің» құны 2 млн-нан 5 млн теңгеге дейін барған.

«Нәтижесінде қолданыстағы біліктілік талаптарын айналып өтіп, 400-ден астам заңды тұлға сәулет, қала құрылысы және құрылыс қызметі саласында I санаттағы лицензияларды заңсыз алған. Тінту барысында заңсыз әрекеттерді растайтын құжаттар мен заттай дәлелдемелер тәркіленді» деп жазылған хабарламада. 

Тергеу жалғасуда.

Еске салсақ, Orda.kz бірер сағат бұрын алаяқтар Қаржылық мониторинг агенттігінің (ҚМА) жалған парақшаларын жасап, онда «жәбірленушілерге қаражатты қайтару» туралы ақпарат таратып жатқанын хабарлаған болатын. Қаржылық мониторинг агенттігінде дипфейк технологиясын пайдалану арқылы жасалатын жаңа алаяқтық фактілері туралы ескертті. Бұл жағдайда қаскөйлер ресми өкілдің бейнесін қолдан жасап, мемлекеттік органның жалған сайтын пайдаланған.

Оқи отырыңыз:

• «Халық заңгері»: дипфейктер Қаржылық мониторинг агенттігіне де қол салды
• «Дамумед» жеке деректерді заңсыз пайдаланып, 66 миллион теңге залал келтірді
• Тоқaев көлеңкелі экономикамен күресетін үш агенттіктің өкілеттігін кеңейтті