Ақмола облысында 20 ауыл таратылуы мүмкін: тұрғындар қалаға көшіп жатыр

Ақмола облысында 20 ауыл мен бірнеше аудан таратылуы мүмкін. Тиісті жоба Open NPA порталында пайда болды. Бұл елді мекендердің басым көпшілігінде халық саны 50-ден аспайды деп хабарлайды Orda.kz.

Урбанистер бұны табиғи үрдіс деп есептейді. Кез келген ауыл қаланың қажеттіліктерін қанағаттандыруға мүмкіндік беретін функцияларды орындауы керек. Әдетте бұл ауыл шаруашылығы, тау-кен өнеркәсібі, өндіріс, туризм және логистика. Ауылдағы осындай бағыттардың бірі бар болса, адамдар сонда қалады.

«Қалалар өсіп келеді, өйткені онда тұру ыңғайлы: жұмыс көп, мансап бойынша өсу бар, сапалы білім, әртүрлі қызмет түрлері, кез келген түрдегі сапалы әлеуметтік қызметтер жетіп артылады. Қазір әлемде халықтың 60 пайыздан астамы қалаларда тұрады», - дейді сәулетші Санжар Қазиев.

Ауылдардағы жалақы қалаға қарағанда төмен. Дегенмен қалаға барлығының көшуі мүмкін емес – мұнда жоғары біліктілік талаптары бар. Ал ауылдарда жұмысшылардың 15 пайызға жуығы тек мектеп білімі болса, қалада бұл жеткіліксіз.

«Қалада платформалық жұмысқа орналасу түрі бар. Сіз барып, біліміңіз бен біліктілігіңіз болмаса да жүргізуші немесе курьер болып жұмыс істей аласыз. Ондағы табыс айтарлықтай жоғары, сондықтан олар келіп, осы жұмыстарды істей алады», - дейді Dasco Group директоры Александра Молчановская.

Ауылдарды жою жобасы 17 сәуірге дейін қоғамдық талқылауға түседі. Жүзеге асыру маусым айына жоспарланған.