2026 жылғы Қысқы Олимпиада ойындарының алауы Римде жағылды

Милан–Кортинадағы 2026 жылғы Қысқы Олимпиада ойындарының алауын жағу салтанаты Римде өтті. Пьяцца дель Квиринале алаңында Олимпиада алауын Италия президенті Серджо Маттарелла жақты, деп хабарлайды Orda.kz ҚР ҰОК дерегіне сүйеніп.

Олимпиада алауы бұған дейін Грекиядан жеткізілген болатын. Эстафетаның алғашқы метрлерін ОИ-2026 ұйымдастыру комитетінің президенті Джованни Малаго мен теннисші Жасмин Паолини алып өтті.

Италия бойынша Олимпиада алауы эстафетасының ресми басталуы 6 желтоқсанға жоспарланған. Маршрут елдің негізгі мәдени және тарихи аймақтарын, соның ішінде ЮНЕСКО-ның көптеген Бүкіләлемдік мұра нысандарын қамтымақ.

2026 жылғы Олимпиада 6–22 ақпан аралығында өтеді.

Қазақстандық спортшылар Қысқы Олимпиада ойындарына 1994 жылдан бері қатысып келеді. Осы уақыт ішінде атлеттеріміз барлығы сегіз медаль: бір алтын, үш күміс және төрт қола жеңіп алған болатын.

Еске салсақ, биыл Алматыда өткен фристайлдан әлем чемпионатында Қазақстан жасөспірімдері тарихи жеңіске жетті.