«Зілзала тіркелді»: Алматы тұрғындары жер сілкінісі туралы ескерту алды

Алматы қаласының тұрғындарына жер сілкінісі туралы ескерту хабарламасы таратылды, деп хабарлайды Orda.kz.

Mass Alert жүйесі арқылы жіберілген ескертуде ғимараттан қауіпсіз жерге шығу ұсынылған.

Хабарламада қала мен маңайындағы сейсмикалық белсенділік туралы мәлімет берілген. Төтенше жағдайлар департаменті тұрғындарға сабыр сақтап, ресми дереккөздерден ғана ақпарат алуға кеңес берді.

Төтенше жағдайлар министрлігінің «Сейсмологиялық зерттеу институты» таратқан мәліметке сүйенсек, дүмпудің эпицентрі Қырғызстан аумағында, Алматыдан 136 шақырым оңтүстік-батыс бағытта орналасқан.

Эпицентр координаттары — 42.032º солтүстік ендік, 76.784º шығыс бойлық. Тереңдігі — 10 шақырым. Энергетикалық санаты — 10.1, магнитудасы — 4.9. Есептік қарқындылығы — сезілмеген.

Тұрғындардың айтуынша, дүмпу сезілмеген.

Осындай ескерту хабарламалары қала тұрғындарына 21 қыркүйекте де жіберілген еді. Ол кезде де жер асты дүмпулері сезілмегенін Сейсмология институтының мамандары растаған. Министрлік сол уақытта сейсмикалық датчиктер мен Mass Alert хабарлау жүйесін баптау жұмыстары жүріп жатқанын хабарлаған болатын.

Mass Alert жүйесі Алматы үшін 5 балл және одан жоғары есептік қарқындылықтағы жер сілкінісі туралы автоматты ескерту жіберуге бейімделген.