«Талғар — ең қауіпті аудан емес»: Сұлтанғазиев өңірдегі қылмыс туралы айтып берді

Алматы облысының әкімі Марат Сұлтанғазиев Талғарға қатысты «қылмыс ошағы» туралы пікірлер шындыққа жанаспайтынын айтты, деп хабарлайды Orda.kz.

Журналистердің сұрағына жауап берген ол неге дәл осы аудан жиі қылмыстық жаңалықтардың тақырыбына айналатынын түсіндірді. Әкімнің сөзінше, шынайы статистика басқаша.

«Полиция департаменті мен Бас прокуратураның арнайы есеп комитетінің деректеріне сүйенсек, Талғардағы қылмыс деңгейі 18 пайызға төмендеген. Жалпы облыс бойынша да көрсеткіштер төмендеп келеді. Талғар шағымдар саны бойынша да көш бастап тұрған жоқ. Еңбекшіқазақ пен Қарасайдан кейін үшінші орында тұр», — деді Сұлтанғазиев.

Оның айтуынша, бірқатар резонансты оқиғалардың көп талқылануы ауданға қатысты жағымсыз ой қалыптастырған. Әйтпесе, өңірдің ахуалы тұрақты, тұрғындары еңбекқор, өз кәсібімен айналысып жүрген адамдар. Көпшілік күн сайын Алматыға барып-келіп оқиды немесе жұмыс істейді.

Осындай ресми мәлімдемелерге қарамастан, дәл осы аймақта елді есеңгіреткен ауыр оқиғалар болып жатады. Еске сала кетейік, соңғы рет Талғар ауданының Тұздыбастау ауылында мас ер адам 15 жастағы қызын 16 рет пышақтап өлтірді.