Тағы да Талғар: Ғалымжан Шерзатұлы 53 күннен кейін қайта жерленді

Талғар полициясында «азапталдым» деп өзіне қол салған Ғалымжан Шерзатұлы 53 күннен кейін жер қойнауына қайта тапсырылды, деп хабарлайды Orda.kz.

Алматыда жұмбақ жағдайда көз жұмған 27 жастағы Ғалымжан Каримовтің сүйегі туған жері — Түркістан облысы Келес ауданында қайта жерленді. Бұған дейін полиция оны «туысы жоқ» деп атаусыз молаға жасырын жерлеп тастаған болатын. 53 күннен кейін ғана ата-анасы ұлының денесін қазып алып, өз ауылына жеткізді.

Еске салсақ, желтоқсанда Алматыда хабар-ошарсыз кеткен 27 жастағы Ғалымжан Шерзатұлы Талғар аудандық полиция бөлімінде азаптауға ұшырағаннан кейін, көп ұзамай өзіне қол салды. Бұл жайлы Ғалымжанның  соңғы хатында айтылды.

Онда, полиция бөлімдегі бейнебақылау камералары сөндіріліп, оның басына пакет кигізіп, ұрып-соққаны айтылған. Азаптаудан кейін Ғалымжан үйіне жіберілген. Сол күні шамамен сағат 23:30-да ол үйіне келген. Келесі күні таңғы сағат алты шамасында Ғалымжан Алатау ауданындағы жалдамалы пәтерінен шығып кеткен. Қала сыртына барып, Шерзатұлы өзіне қол салды.

Ал ресми органдар оның мәйітін «туыстары жоқ адам» ретінде жерлеп, бұл туралы ата-анасына тек 40 күннен кейін ғана хабарлаған.