«Сотталған шенеуніктің ұлы»: Жандос Иманалиев президент әкімшілігіне қызметке келді

Ақорда президент әкімшілігіне тағы бір адамның тағайындалғаны туралы мәлімдеді. Сыртқы саясат бөлімінің меңгерушісі қызметіне Жандос Иманалиев келді. Orda.kz редакциясы бұл адам туралы қызықты дерек тапты. 

Оның әкесі — Бақытбек Иманалиев бір кездері Нұр Отан партиясында болған және Жамбыл облысы әкімінің орынбасары қызметін атқарған. Сонымен қатар, президент әкімшілігінде, Назарбаевтың жанында жұмыс істеген. 

Ең қызығы Иманалиев бірнеше жыл бұрын істі болған. Мемлекеттік материалдық резервтер комитетінің бұрынғы төрағасы болған Иманалиев 8 жылға бас бостандығынан айырылған. Ол осы мемлекеттік комитеттің басшысы ретінде қарамағындағылармен бірге алты жарым миллиард теңге жымқырған. Экс-шенеунікке өмір бойы мемлекеттік қызметте жұмыс істеуге тыйым салынды және тұңғыш президенттің қолынан алған барлық марапаттарынан айырылды.

Бірақ, ол сегіз жылдың орнына бір жыл ғана абақтыда отырып, денсаулық жағдайына байланысты жазадан босатылды. Енді экс-шенеуніктің ұлы президент әкімшілігіне қызметке келді. 

Айта кетейік, бұрынғы Ұлттық экономика министрі де жаңа қызметке тағайындалды. Экс-министр Нұрлан Байбазаров президент әкімшілігінің инвестициялар және сауда бөлімінің меңгерушісі лауазымына келді. Нұрлан Байбазаров 2024 жылдың 6 ақпанында Ұлттық экономика министрі қызметіне тағайындалып, 21 желтоқсанында босатылған еді. 

Айта кетейік, Қырғызстанда 17 жастағы Айсулуу Мұқашеваны өлтірді деген күдікпен ұсталған 41 жастағы Құмарбек Абдыров бірнеше қылмысын мойындады.