Шарын шатқалында тағы бір туристер тобы мерт бола жаздады

Шарын шатқалында тағы  бір топ турист төтенше жағдай орын алған аумақтан шыға алмай қалды, деп хабарлайды Алматы облысы төтенше жағдайлар департаменті.

Облыстық төтенше жағдайлар департаментінің хабарлауынша, әлеуметтік желілерге бақылау жүргізу кезінде  11 маусым күні шамамен сағат 20: 00-де Шарын шатқалынан  туристердің  шыға алмай жатқандығы анықталды. Бұл туралы блогер Тайыр Марасулов инстаграмда көмекке шақырып,  жазба жариялаған.

— Дереу оқиға орнына Алматы облысының төтенше жағдайларды жою бөлімі күштері мен құралдары және «Шарын шатқалы»  мемлекеттік ғылыми-өндірістік кәсіпорны жіберілді. Зардап шеккендер мен құрбандар жоқ, - деп мәлімдеді ТЖД.

Алматы облысы Төтенше жағдайлар департаментінің хабарлауынша, 11 маусымда «Шарын шатқалы» мемлекеттік ғылыми-өндірістік кәсіпорнының Кіші Шарын шатқалы аумағында жауған жаңбырдың әсерінен көлбеу ағын пайда болған.

Бұған дейін Алматы облысының Төтенше жағдайлар департаменті СМС арқылы, әлеуметтік желілерден, «Дәрмен» мобильді қосымшасынан және бұқаралық ақпарат құралдарынан көлбеу ағынның болу мүмкіндігі және өзендердегі су деңгейінің көтерілуі, сондай-ақ алдағы нөсер жаңбыр туралы хабардар еткен.

Жеті адамнан басқа демалушылар болмаған. Төтенше жағдайлар департаменті кезекті рет азаматтарды ауа райының өзгеруін қадағалап, сақтық шараларын сақтауға шақырды.