ШҚО тұрғыны заңсыз ауланған 350 кг балығымен Павлодарда ұсталды

Павлодарда Шығыс Қазақстан облысының тұрғынынан 350 келі заңсыз ауланған балық тәркіленді. Бұл туралы Polisia.kz хабарлады.

20 желтоқсанда Май ауданындағы рейдтік іс-шара кезінде Павлодардың табиғатты қорғау полициясының қызметкерлері Қаратерек ауылының маңында Ленин-Курчатов тас жолында УАЗ автокөлігін тоқтатқан.

«Көлікті көрші Шығыс Қазақстан облысының тұрғыны тізгіндеген. Автокөлікті тексерген кезде, тиісті құжаттары жоқ крест балықтары табылды. Нәтижесінде салмағы 350 келі болатын балықтар, сондай-ақ 100 метрлік Қытайда жасалған торлар тәркіленді. Аталған фактімен Қылмыстық кодекстің 335-бабы 3-бөлігі бойынша сотқа дейінгі тергеу басталды», - дейді полиция басқармасы бастығының бірінші орынбасары Жасқайрат Қайыров.

Шығыс Қазақстан тұрғыны аймақтан шықпау туралы алдын-алу шарасына қол қойды.

Айта кетсек, осы жылдың басынан бастап табиғатты қорғау полициясы 518 келі заңсыз ауланған балық тәркілеген. Балықтардың барлығы сот шешімімен Павлодардың аумақтық инспекциясына өткізілді.