Қайрат Сатыбалдының ісі бойынша сот басталды

Астанада Қазақстанның экс-президенті Нұрсұлтан Назарбаевтың немере інісі Қайрат Сатыбалдының ісі бойынша сот отырысы басталды.

Бұл туралы Orda.kz елордалық соттың баспасөз қызметі хабарлады.

Іс Астана қаласы Байқоңыр ауданының №2 сотында қаралып жатыр. Қайрат Сатыбалдыұлына «Алдау немесе сенімге қиянат жасау арқылы мүліктік залал келтіру», «Басып алу немесе иемдену, яғни сеніп тапсырылған бөтеннің мүлкін жымқыру» баптары бойынша қылмыс жасады деген айып тағылып отыр.

Тамыз айының соңында Сыбайлас жемқорлыққа қарсы қызмет Қайрат Сатыбалдыұлына және басқа да тұлғаларға қатысты «Қазақтелеком» АҚ мен «Көлік қызметі орталығы» АҚ-ның аса ірі көлемде қаржы жымқыру фактілері бойынша сотқа дейінгі тергеуді аяқтағаны белгілі болды.

Шенеуніктер бұл іске қатысты тағы үш күдікті бар екенін айтады. Тергеу барысында сотталушылардың заңсыз иемденген мүлкі мен қаражат есебінен мемлекетке жалпы сомасы 240 миллиард теңгеден астам қаржы қайтарылды.

Сондай-ақ, бұған дейін Қайрат Сатыбалдыұлына қатысты салық және кедендік төлемдерді төлеуден жалтару, қылмыстық кірісті заңдастыру фактілері бойынша қылмыстық істер қосымша тергеліп жатқаны айтылған болатын.