Полиция қызметкері үйіне қайтып бара жатқан жерде көз жұмды

Алматы полиция департаментінің қызметкері жол көлік апатына ұшырап, мерт болды.

Бұл туралы Orda.kz хабарлады.

Екі көліктің соқтығысуы 19 мамырда сағат 09:00 шамасында Көлді-Жалпақсай тас жолында (Алматы облысы Қарасай ауданы) орын алды.

Mazda-626 автокөлігінің жүргізушісі көлікті басқара алмай, қарсы жолаққа шығып кеткен. Ол жерде Алматы қаласы патрульдік полициясының инспекторы, 1999 жылы туған Қалымов Надир тізгіндеген Lada Granta көлігі келе жатқан.

– Салдарынан Lada Granta көлігі жолдың шетіндегі ағашқа соғылған. Полиция кіші сержанты Н. Қалымов түнгі ауысымнан үйге қайтып келе жатқан. Ол алған жарақаттарынан оқиға орнында қайтыс болды, - деп хабарлады Алматы облысы полиция департаментінің баспасөз қызметі.

Mazda-626 көлігінің жүргізушісі түрлі жарақаттармен ауруханаға жатқызылды.

Қарасай ауданының полициясы жол-көлік оқиғасы фактісі бойынша ҚР Қылмыстық кодексінің 345-бабы бойынша тергеу жүргізуде.

Надир Қалымов ішкі істер органдарында 2019 жылдың қыркүйегінен бастап қызмет етті. Оның артында анасы мен жүкті әйелі қалды.