«Лас жүйеге мойынсұнбаймыз»: Түркияда үш қаланың әкімі ұсталды

Түркияда оппозициялық Республикалық халық партиясынан (CHP) сайланған үш бірдей қала әкімі Анталья, Адана және Адыяман басшылары ұсталды, деп хабарлайды Orda.kz.

Ресми мәліметтерге сәйкес, операция Измир мен Манавгаттағы тергеуден кейін басталған. Ұсталғандардың қатарында Адана қаласының әкімі Зейдан Каралар мен Адыяман мэрі Абдуррахман Тутдере бар.

«Мені Анкарада, өз үйімде тұтқындап, Ыстамбұлға алып бара жатыр», — деп жазды Тутдере әлеуметтік желідегі парақшасында.

Араға көп уақыт салмай, Республикалық халық партиясы төрағасының орынбасары Бурханеттин Булут Анталья әкімі Мухиттин Бөчектің де қамауға алынғанын растады.

«Сот жүйесін саяси кек алу құралына айналдырғандар заңды емес, өз билігін сақтап қалуға ғана мүдделі. Біз халықтың еркіне қарсы бағытталған бұл лас жүйеге ешқашан мойынсұнбаймыз», — деді ол мәлімдемесінде.

Тергеу аясында барлығы 10 адамға қатысты қамауға алу туралы ордер шығарылған. Оларға тағылған айыптар — жергілікті билікте қаржы жымқыру және өкілеттікті асыра пайдалану күдігі.

Биылғы наурызда CHP-нің тағы бір беделді өкілі — 2028 жылғы президент сайлауында Режеп Тайып Ердоғанның басты қарсыласы ретінде қарастырылған Стамбул мэрі Экрем Имамоғлуның қамауға алынуы ел ішінде кең ауқымды наразылыққа себеп болған еді.