«Қызметтік куәлік жойылды»: Әскери қызметкер алаяқтығы үшін сотталды

Ақтөбе гарнизонының әскери соты алаяқтық жасады деп танылған бұрынғы капитанға 3 жыл 6 ай мерзімге бас бостандығын шектеу жазасын тағайындады,  деп хабарлайды Orda.kz.

Үкімге сәйкес оған кешкі уақытта ойын-сауық орындарына баруға тыйым салынды.

Іс Атырау облысы Исатай ауданындағы Қорғаныс істері жөніндегі бөлімде қызмет еткен Елнұр М-ға қатысты қаралды. Ол ҚК-нің 190-бабы 3-бөлігі 1-тармағы бойынша — қызметтік өкілетін пайдаланып алаяқтық жасады деген айыппен кінәлі деп танылды. Сотталушы 1991 жылы Талдықорғанда туған, жоғары білімді, үйленген.

Үкім мәтінінде оның қандай алаяқтық әрекет жасағаны көрсетілмеген. Іс материалдары жарияланбайтыны атап өтілді. Тараптар процеске онлайн қатысқан. Сот отырысында жәбірленушілермен процестік келісім жасалғаны хабарланды.

Судья Айдана Мамбетқазиева «оған мемлекеттік әскери қызметте, судья ретінде, жергілікті өзін-өзі басқару органдарында, Ұлттық банкте және қаржы ұйымдарында қызмет ету құқығынан 5 жылға айыра отырып, 3 жыл 6 ай мерзімге бас бостандығын шектеу жазасы тағайындалсын» деп жариялады.

Үкімге сәйкес, оған пробациялық бақылау белгіленеді. Кешкі 22:00-ден таңғы 06:00-ге дейін ойын-сауық орындарына және алкоголь сатылатын қоғамдық орындарға баруға тыйым салынды. Әскери атағы — капитан шенінен айырылды.

Тергеу барысында алынған қызметтік куәлігі жойылады. Заттай дәлелдеме ретінде тәркіленген iPhone 14 Pro сотталушыға қайтарылады.

Автор: Ардақ Ерубаева