Қазақстанда телефон нөмірін бір оператордан екіншісіне көшіру тәртібі өзгеруі мүмкін

Қазақстанда абонент нөмірін бір оператордан екіншісіне көшіру тәртібі қайта қаралмақ. Жаңа жобаға сәйкес, SIM-карта алғаш қосылғаннан кейін 60 күн өтпесе, оператор нөмірді көшіруден бас тарта алады. Ал сұранысқа жауап беру уақыты 10 минутпен шектеледі. Бұл туралы Orda.kz хабарлайды.

Жасанды интеллект және цифрлық даму министрлігінің өкілдері бұл өзгерістер клиент тәжірибесін жақсартады дейді. Бұйрық жобасы осы жылдың 6 наурызына дейін "Ашық НҚА" порталында жария талқылауда болады.

Айта кетейік, Қазақстанда абонент нөмірін көшіру (Mobile Number Portability — MNP) қызметі 2016 жылдан бері жұмыс істейді. Бұл жүйе пайдаланушыға телефон нөмірін сақтай отырып, байланыс операторын ауыстыруға мүмкіндік береді. Механизмді реттейтін негізгі құжат — 2015 жылғы №1105 бұйрық.

Қазіргі уақытта нөмір көшіру процесі Орталық дерекқор (ЦБДАН) арқылы жүзеге асады: абонент жаңа операторға өтінім береді, ал бұрынғы оператор (донор) сұранысты техникалық тұрғыда растауы керек.

Ұсынылып отырған өзгерістер екі негізгі норманы енгізеді. Біріншісі, егер нөмір алғаш рет қосылғаннан кейін 60 күн өтпесе, оператор көшіруден бас тартуға құқылы болады. Бұл маркетингтік акцияларды теріс пайдаланудың алдын алу шарасы ретінде түсіндіріліп отыр. Ал екіншісі, донор-оператор сұранысқа ең көп дегенде 10 минут ішінде жауап беруге міндеттеледі. Бұл нөмір ауыстыру кезіндегі байланыс үзілуін азайтуға бағытталған. Жоба әзірлеушісі — Қазақстанның Жасанды интеллект және цифрлық даму министрлігі.

Оқи отырыңыз:

• Qarakesek атымен танылған рэперге сот үкімі шықты
• «Қар көшкіні жүруі мүмкін»: Синоптиктер алматылықтарға ескерту жасады