Қазақстан мен Өзбекстан Сырдарияның экологиялық тепе-теңдігін сақтауда ынтымақтасады

Астанада гибридті форматта Сырдария өзені бассейніндегі қоршаған ортаны қорғау және судың сапасы жөніндегі Қазақстан-Өзбекстан бірлескен жұмыс тобының  6-шы отырысы өтті.

Жиынға  Қазақстан Республикасы Экология және табиғи ресурстар министрлігі Экологиялық саясат департаменті директоры міндетін атқарушы Н.И.Дәулетиярова, Өзбекстан жақтан Өзбекстан Республикасының экология министрлігі Қоршаған ортаны қорғау және климаттың өзгеруі департаментінің басшысы Ф.Қ.Саттаров қатысты.

Іс-шараға бақылаушы ретінде Тәжікстан мен Қырғыз өкілдері де қатысты.

Отырыс барысында қатысушылар Сырдария өзеніндегі су сапасына келісілген мониторинг жүргізу, деректермен алмасу, Келес және Шыршық өзендерінің ластануының ықтимал көздерін түгендеу бойынша жұмыс тобының жұмыс жоспарын іске асыру мәселелерін талқылады. 

Сырдария өзені бассейніндегі анықталған ластану көздері бойынша қабылданған шаралар нәтижелері, келісілген көрсеткіштер саны бойынша түп шөгінділеріне біржолғы талдау жүргізу мәселелерін зерделеу, коллекторлық-дренаждық су ағындарының су нысандары жағдайына әсерін зерттеу және олардың әсерін азайту шаралары және т.б.  сұрақтар қарастырылды.

Сонымен қатар, 2023 жылғы 13 желтоқсанда өткен судың сапасы бойынша облыстық жұмыс тобы отырысының қорытындысы туралы мәселе нақтыланды.

Отырыс қорытындысы бойынша жұмыс тобының алдағы жылға арналған жұмыс жоспары қабылданды.