Эльвира Азимова: Конституциялық комиссия алдында айрықша миссия тұр

Комиссия төрайымы Конституциялық реформаның негізгі мақсаттары мен міндеттерін атады. Конституциялық комиссияның төрайымы, Конституциялық соттың төрағасы Эльвира Азимова комиссияның алғашқы отырысында Конституциялық реформаның басты мақсаттары мен міндеттерін айқындады, деп хабарлайды Orda.kz.       

Ол 2025 жылғы 8 қыркүйекте Мемлекет басшысы Қазақстан халқына Жолдауында жасанды интеллект дәуірінде еліміздің әлеуметтік-экономикалық дамуына елеулі оң ықпал ететін жаңа саяси реформа жариялағанын еске салды.

Президент «Күшті Президент – ықпалды Парламент – есеп беретін Үкімет» тұжырымдамасы негізінде бір палаталы парламент құру бастамасын көтерген болатын.

2025 жылғы қазан айынан бастап парламенттік реформаны әзірлеу жөніндегі жұмыс тобы қызмет атқарды. Оның құрамына белгілі заңгерлер мен сарапшылар, саяси партиялар мен қоғамдық ұйымдардың өкілдері кірді. Осы кезеңде жұмыс тобы барлық ұсыныстарды мұқият зерделеп, жүйеледі, сондай-ақ азаматтардан түскен ұсыныстарды талдады.

«Азаматтардан келіп түскен ұсыныстар тек бір палаталы парламент мәселесімен шектелмеді. Осыған байланысты Мемлекет басшысы Конституциялық реформа жөніндегі комиссия құру туралы шешім қабылдады. Қазіргі уақытта жұмыс тобы мүшелерінен бөлек, азаматтардан 2000-нан астам ұсыныс түсті. Кеңейтілген форматтағы Конституциялық комиссияны құру осы уақыт бойы жүргізілген жұмыстың логикалық жалғасы әрі бірнеше айға созылған қоғамдық талқылаулар барысында қалыптасқан ауқымды қоғамдық сұранысқа жауап болды. Президент Ұлттық құрылтайдың V отырысында ұсынған мемлекеттік билікті реформалау бастамалары – бір палаталы парламентке, яғни Құрылтайға көшу, Халық Кеңесін құру, вице-президент лауазымын енгізу және өзге де мәселелер кешенді әрі жан-жақты пысықтауды талап етеді», – деді Эльвира Азимова. 

Ол Қазақстан Республикасының саяси жаңғыртудың жаңа кезеңіне қадам басып отырғанын атап өтті. Мемлекет басшысы одан әрі даму институционалдық тепе-теңдікті нығайтусыз, заң шығарушы биліктің тиімділігін арттырмай, тежемелік әрі тепе-теңдік жүйесін күшейтпей, сондай-ақ қоғамның мемлекет басқаруына қатысуының конституциялық тетіктерін жаңартпай мүмкін еместігін нақты айқындады.

«Конституциялық реформа бойынша өз бастамаларын барлық саяси партиялар, үкіметтік емес ұйымдар, бизнес-құрылымдар, сондай-ақ заңгер-ғалымдар мен сарапшылар жолдады. Сондықтан Конституциялық комиссияны құруды салалық өзгерістерден кешенді конституциялық трансформацияға көшу ретінде қарастыру қажет. Комиссия құрамына Қазақстан Республикасы Парламентінің депутаттары, мәслихат төрағалары, бұқаралық ақпарат құралдарының басшылары, қоғам қайраткерлері, мемлекеттік органдардың, өңірлік қоғамдық кеңестердің өкілдері, сарапшылық және ғылыми қауымдастық мүшелері енді. Бұлардың барлығы қоғамымыздағы көзқарастардың, тәжірибенің және үміттердің алуан түрлілігін көрсетеді. Конституциялық комиссияның алдында айрықша миссия тұр – бір жағынан конституциялық құрылыстың іргелі қағидаттарын сақтай отырып, екінші жағынан қазіргі заманғы сын-қатерлерге лайықты жауап бере алатын Негізгі заңның оңтайлы теңгерімін қамтамасыз ету. Сіздердің кәсібиліктеріңіз, отаншылдықтарыңыз бен байыпты ұстанымдарыңыз барлық ұсынысты жан-жақты қарастырып, жинақтауға және еліміздің дамуына қуатты серпін беретін нақты өзгерістердің салмақты жобасын әзірлеуге мүмкіндік береді деп сенемін», – деді комиссия төрайымы. 

Конституциялық комиссияны құру туралы жарлыққа Президент 21 қаңтарда қол қойды. Құжатқа сәйкес, Конституциялық комиссияның төрайымы болып Конституциялық соттың төрағасы Эльвира Азимова тағайындалды. Оның орынбасарлары – Мемлекеттік кеңесші Ерлан Карин және Премьер-министрдің орынбасары – Мәдениет және ақпарат министрі Аида Балаева. Ал Конституциялық комиссияның хатшысы болып Президент Әкімшілігінің мемлекеттік-құқықтық бөлімінің меңгерушісі Айдар Жарылғанов бекітілді.

Оқи отырыңыз:

• «Кәсібиліктің жоқтығы мен немқұрайлылық» — Тоқаев медсақтандыру қорындағы былықтар туралы айтты
• Президент алаяқтар мен жемқорлардың жымысқы әрекетін алдын алуды тапсырды
• Аида Балаева: жекеменшік мектептер білім сапасын төмендетті