Испания короліне халық балшық лақтырды

Испания королінің су тасқынынан зардап шеккен Валенсия аймағына сапары жергілікті тұрғындардың ашу-ызасын тудырды. Король елдің премьер-министрі және Валенсия өңірі басшысымен бірге шығыс Испанияның зардап шеккен аудандарын аралап, табиғи апат салдарын өз көзімен көрді, деп хабарлайды Orda.kz.

Алайда, ABC газетінің мәліметіне қарасақ, жергілікті тұрғындарды корольдің келуі қуантқан жоқ.

Олардың ашулануына, әсіресе, әскерилердің қала көшелерін тазалауға тек король келер алдында ғана кіріскені себеп болды.

Халық король келгенде ысқырып, «Қанішерлер!» деп айқайлап, балшық пен тас лақтыра бастады. Шу басталған соң, премьер-министр оқиға орнынан тез арада кетіп қалды, ал король елді сабырға шақырып, ары қарай көшелерді аралай берді.

Айта кетсек, қазан айының соңында Испанияның шығысында қатты жаңбыр жауып, Валенсия провинциясын су тасқыны басты. Салдарынан шамамен екі айлық жауын-шашын нормасы бірден түсті. Табиғи апаттан екі мыңдай адам із-түзсіз жоғалып, екі жүзден астам адам қайтыс болды.