«Инвестор келіндер»: Алматыда қол жетпес алаяқ «күйеу жігітке» үкім шықты

Жылдар бойы әйелдерді алдап жүрген азамат Рамазан Исхаровтың әрекеті әшкере болды.  Orda.kz редакциясына Тамара, Надежда және Нұржамал атты үш қыз келді. Үшеуін де бір адам үптеп кеткен, олар  «Исхаров бізбен танысты, қарым-қатынас, неке, бірлескен бизнес уәде етіп, сосын сан соқтырып, ақшаны алып тайып тұрды» дейді. Қазан айында аферист «күйеу жігіт» ақыры жауапқа тартылды. Жақында Алматының Әуезов аудандық соты Рамазан Исхаровты аса ірі көлемдегі алаяқтық жасағаны үшін төрт жарым жылға бас бостандығынан айырды.

Құрбандар екі жыл күткен істің ақыры

Исхаров ісі бойынша процесс 2025 жылдың көктемінен бастап созылып келеді, ал негізі  «істің» өзі екі жылдан астам уақыт бұрын басталған. Адвокат Оксана Бурякқа 2023 жылы жәбірленушілердің бірі Тамара шағымданған (жәбірленушілердің аты-жөндері өзгертілгенін еске саламыз).

Тамара бала кезінен аңқау әрі сенгіш болыпты. Оның туа біткен патологиясы бар. Оған кішкентай кезінен бастап дәрігерлер психикалық дамудың тежелуі, жалпы сөйлеу дамуының (ОНР) екінші дәрежесі және тағы басқадай да диагноз қойған.

«Менің қызым Рамазан Исхаров атты жігітпен танысқан. Біраз уақыттан кейін ол оны өз отбасымен таныстырды. Оған үйленуге уәде берді. Оны сол кезде да одан кейін де «келін» деп атап жүрді. Ол оны өз мәселелерін шешу үшін несие алу керек деп сендірген. Оның банк кәртішкесін пайдаланған, яғни сенімге соншалықты кіріп алған. Ал ол өте аңқау қыз, оны бірдеңеге көндіру сондай қиын емес», - деп бөлісті бізбен алданған қыздың анасы. 

Ақырында Исхаров Тамараға сегіз миллион несие алдырған, оған қоса ол пәтерінен де айырылып қала жаздаған.

Тағы бір жаға ұстатар оқиғаны бізге Надежда айтып берді. Бір жыл ішінде ол Рамазанға 36 миллион теңгеден астам ақша аударыпты. Ол Алматыдағы жеке меншік клиникалардың бірінде дәрігер болып жұмыс істейді. Ол барлық табысын түгелдей дерлік «өтірікші күйеуге» беріп отырған. Бұрынғы кепілдіктері мен несиелерінен бөлек ол қызға 9,6 миллион теңгеге екі түсініксіз қолхат ұстатып кеткен, онда ол кімнен қарыз алып жатқанын да көрсетпеген.

Бұл Исхаровтың екі құрбанының ғана оқиғасы, бірақ олардың саны әлдеқайда көп болуы мүмкін. Одан зардап шеккендердің бірі инстаграмда өзін қалай алдағанын айтып берді. Дегенмен ғаламтордан Рамазан айласының басқа құрбандары да табылды. Ең қызығы олардың қатарында тек қыздар ғана емес, ер-азаматтар да бар. Әрине, ол оларға «үйленуге» уәде бермеген, бірақ ақшаны көлікке кедендік ресімдеуді жеделдеткені, несие ресімдегені, жүргізуші куәлігін алғаны үшін алып отырған...

Зардап шеккендердің полицияға жазған арыздарына қарамастан, тергеулер жылдар бойы созылып «құрамның жоқтығынан» жабылып отырған. Құжаттар бөлімнен бөлімге ысырылып, материалдар «жоғалды», ал сараптамалар ұзаққа созылды. Міне, енді ғана үкім шықты.

Айла қалай  қалай іске асты

Тергеу анықтамасына сәйкес, Исхаров ақшаны «полицияға көмектесу», «қарыздарды жабу», «арзан бағамен машина сатып алу», «бизнеске инвестиция салу», «фотосалон ашу» деген түрлі сылтаумен алып отырған.

Ол ақшаны жеке қажеттіліктеріне - ойын-сауыққа, зат сатып алуға, жол жүруге және бұрынғы қарыздарын өтеуге жұмсаған. Мәселен, Тамарадан «қарызға алған» алғашқы ақшасына «қол жетпес күйеу» өзінің гардеробын жаңартқан.

Құрбандар оның «сүйіспеншілігіне» күмән келтіріп, қарыздарды рәсімдеуге қарсылық көрсетсе, Исхаров психологиялық тұрғыдан қысым көрсетіп, қоқан-лоқы жасап «органдағы байланыстарымен» қорқытқан, тіпті зорлық-зомбылық жасаудан да тайынбаған.

Мысалы, Тамара ақшадан бас тартқанда, ол оның мысығын ұстап алып, алтыншы қабаттан лақтырып жіберемін деп қорқытқан. Сондықтан сот алаяқтықты ғана емес, оның құрбандарға тигізген психологиялық қысымын да талдап шықты.

 Жұқарған жіп үзіледі

Алғашқы отырыстарда Рамазан әртүрлі жауап берді. Оның қисыны әр жауабында әртүрлі болған. Содан кейін ол ашуға беріліп, тікелей жауаптардан жалтарып, бірақ соңында соттың ескертпелерімен өз кінәсін мойындауына тура келді.

«Мысалы, Тамараның ісі бойынша ол: «иә, мен өзімнің кінәмді мойындаймын», дей тұра бірақ соттың «сіз бұл ақшаны алдыңыз ба?» деген сұрағына әр жолы: «жоқ, мен оны алмадым, мен Тамараға көмектестім, себебі оған жаным ашыды» деп жауап берді, - деп түсіндірді Оксана Буряк. 

Исхаровтың еш  өкінбегені анық, жәбірленушілерден кешірім де сұрамады. Өз өзіне берілген сөзде соттан оны бас бостандығынан айырмай, айыппұл тағайындауды сұрады.

«Одан кейін ол бас бостандығын шектеу түріндегі жаза тағайындауды өтініп: «мен жұмыс істеп, залалды өтеймін» деді. Оған біз, әрине, бұл адамның бостандықта қала алмайтынын айтып, қарсылық білдірдік, себебі ол жұртты алдаудан басқа ештеңе білмейді және оның таза жолмен ақша тауып, шығынды өтейтініне күмән көп, оның үстіне ондай «жақсылық» жасау үшін оның  екі жарым жыл уақыты болды», - дейді Буряк. 

Сот Исхаровтың әрекетін аса ірі мөлшердегі алаяқтық (ҚР ҚК 190-б. 3-б. 1-т. және 4-т.) және абайсызда денсаулыққа зиян келтіру (ҚК 109-б. 1-б.) деп саралады. Ол қауіпсіздік жағдайы орташа мекемеде жазасын өтеп, төрт жарым жылға бас бостандығынан айырылды. Сот жеңілдететін мән-жайларды тапқан жоқ.

Азаматтық талаптар ішінара қанағаттандырылды. Егер Исхаров зиянды ерікті түрде 15 күн ішінде өтемесе, материалдар сот орындаушыларына жіберілетін болды.

«Біз жәбірленушілерге келтірілген моральдық зиянды өтеуді сұрадық, бірақ сот бас тартты. Бұл, бәлкім, сотқа емес, прокуратура мен тергеу органдарына қатысты мәселе шығар, біздің ойымызша олар тиісті тергеу жүргізбеген. Біздің апелляцияға беру мүмкіндігіміз бар және Исхаров та сот шешіміне шағымдануы мүмкін», - деді жәбірленушілердің адвокаты. 

«Орда» үкімнің орындалуын және әлі күнге дейін өздері туралы мәлімдеуге қорқып жүрген басқа да жәбірленушілердің үн қатқанын қадағалауды жалғастырады.

Авторы: Наталья Овчинникова