«Фашист, нацист»: Қазақша мәзір беруден бас тартқан кафе кешірім сұрады

Алматы көшелерінің бірінде орналасқан Bratskiy Shashlyk кафесі қазақ тілінде мәзір беруді талап еткен қонағын «фашист», «нацист» деп атады, деп хабарлайды Orda.kz.

Кейін ұжым өзінің Instagram парақшасына кешірім сұрап, қазақ тіліне аса құрметпен қарайтындарын, сондай-ақ 2ГИС қосымшасында қазақ тіліндегі мәзірді талап еткен қонақтарға кім жауап жазғанынан беймәлім екенін жазды.

«Келтірілген қолайсыздықтар үшін шын көңілмен кешірім сұраймыз. Сондай-ақ, біздің атымыздан кім жауап беріп жатқанын білмегенімізді атап өткіміз келеді. Бірақ бұл жағдай біздің ұстанымымызға және құндылықтарымызға мүлде сай келмейді. Біз қазақ тіліне үлкен құрметпен қараймыз және оны жоғары бағалаймыз» деп жазды олар.

Айта кетейік, осы дәмхананың меймандарының бірі олардан қазақ тілінде жазылған мәзірді талап еткен, ал дәмхана қызметкері оны «фашист», «нацист» деп атап, кейін «егер жазған пікіріңді өшірмесең, қонақтарыңды күте бер» дегендей пікірлер жазып, әбестік танытты.

Еске сала кетейік, бұған дейін америкалықтар Temu бағдарламасын сотқа беріп жатқанын хабарлаған болатынбыз.