Еуропада энергетикалық дағдарыс

«Газпром» 2022 жылы жеткізілімдегі бұзушылықтар үшін компанияны 230 миллион еуро төлеуге міндеттейтін сот шешімінен бірнеше күн өткен соң Австрияға газ беруді тоқтатты, деп хабарлайды Orda.kz.

16 қарашада Газпром Австрияға табиғи газ беруді тоқтатты. Австриялық OMV энергетикалық компаниясы ресейлік компанияны 2022 жылы табиғи газды тұрақты жеткізбегені үшін 230 миллион еуро төлеуге міндеттейтін сот шешімін жеңіп алғаннан кейін үш күн өткен соң олар газ беруді тоқтатты.

Австрия канцлері Карл Нехаммер азаматтарды елдің бұндай жағдайға дайын екеніне сендірді.

«Газ қоймалары 93 пайызға толы, ал жанармай тапшылығы тұрғындарға қауіп төндірмейді. Австриядағы ешбір пәтер осы жағдайға бола жылынбай қалмайды», - деді ол.

Әсіресе одақтағы көптеген елдер Ресей газын сатып алудан бас тартқаннан кейін де Еуропалық Одақтағы ресейлік газдың ең ірі импортшысы Австрия  болып қалған болатын.

Алайда, Австрияға газ жеткізу мүмкін болмай қалды, өйткені транзит Украина арқылы жүзеге асырылады.  Ал Киев Ресеймен тиісті келісімшартты жаңартудан бас тартты. Қазіргі уақытта Еуроодақта Ресей газын алуды жалғастырып жатқан тек Венгрия мен Словакия.