Еуроодақ Ресейдің мұнай және банк секторына қарсы жаңа санкциялар енгізді

Еуропалық Одақ Ресейге қарсы 18-ші санкциялар пакетін мақұлдады. Жаңа экономикалық шектеулер ресейлік мұнай мен банк секторына қатысты, деп хабарлайды Orda.kz.

Bloomberg агенттігінің жазуынша, ЕО-ның 18-ші санкциялық пакеті Ресейдің 20-дан астам банкiн SWIFT жүйесінен ажыратуды және олармен кез келген қаржылық операцияларға толық тыйым салуды көздейді. Сонымен қатар, ресейлік мұнайдан үшінші елдерде өндірілген жанармайға да шектеулер енгізіледі. Қара тізімге ішінара «Роснефтьке» тиесілі Үндістандағы мұнай өңдеу зауыты кірді.

Бұдан бөлек, Еуроодақ ресейлік мұнай бағасына қойылған шекті бағаны белгілеу тәсілін өзгертті. Бұрынғы тұрақты шек орнына енді өзгермелі шек енгізілді — ол нарықтық бағадан 15% төмен деңгейде болады. Бұл шекті баға жылына кемінде екі рет қайта қаралып отырады. Алғашқы кезеңде ресейлік мұнайға арналған шекті баға барреліне 45–50 доллар көлемінде белгіленбек.

Bloomberg мәліметінше, бұған дейінгі баға шектеуі тиімді болмаған: Ресей көмірсутектерді Қытай мен Үндістанға белсенді түрде экспорттауды жалғастырды, ол үшін «көлеңкелі танкер флотын» пайдаланды. ЕО бұл флотқа да санкциялар енгізіп, шектеу қойылған кемелердің жалпы санын 400-ден асырды.

Қазақстан үшін ерекше маңызды тұсы — ресейлік мұнайдан өндірілген жанармайға қатысты шектеулер. Әзірге Павлодар мұнай-химия зауытында (ПМХЗ) шығарылатын өнімдерге бұл санкциялар әсер ете ме, белгісіз. Себебі онда Сібірден жеткізілетін ресейлік мұнай толлингтік (өңдеуге берілетін) схема бойынша ішінара пайдаланылады.

Сондай-ақ, Ресейге санкцияларды айналып өтуге көмектескен үшінші елдердегі бірнеше компанияға да шектеулер енгізілді. Арасында қазақстандық фирмалар бар-жоғы әзірге нақты айтылған жоқ.

2023 жылы Қазақстан тәуелсіз несиелік рейтингін сақтап қалып, қайталама санкциялардан құтылған болатын.

2025 жылы Қазақстан Ресейден 1500 «санкцияланған» бағдаршам сатып алды.