Еліміздегі экологиясы нашар 10 қаланың тізімі анықталды

Үкімет отырысында Мағзұм Мырзағалиев еліміздегі ауаның ластану деңгейі жоғары 10 қаланы атады.

"Халық үніне құлақ асатын мемлекет" тұжырымдамасын негізге ала отырып, экологиялық проблемалар мен оларды шешу жолдарын барлық өңірдегі жұртшылықпен, әсіресе экоактивистермен қарастырдық. Барлығы 17 онлайн-кездесу өтіп, 25 мыңға жуық адам қатысты. Талқылау нәтижелері бойынша әкімдіктермен және табиғат пайдаланушыларымен бірлесіп, 17 жол картасы әзірленді. Бұл құжаттарда өңірлердегі экологиялық ахуалды жақсарту жөніндегі нақты шаралар қарастырылған", - деді экология, геология және табиғи ресурстар министрі Мағзұм Мырзағалиев.

Атмосфералық ауаның экологиялық мониторингіне сәйкес 2019 жылдың қорытындысы бойынша ауаның жоғары ластану деңгейі тіркелген 10 қаланы министр атап өтті.

"Баршамызды мынадай экологиялық проблемалар алаңдатып отыр. Бұл - атмосфералық ауа мен жерүсті суының ластануы, қалдықтарға байланысты жұмыстың жетілмеген жүйесі, сондай-ақ ежелден ластанған жерлер мен көгалдандырудың жетіспеушілігі. 2019 жылдың қорытындысы бойынша атмосфералық ауаның экологиялық мониторингіне сәйкес, 45 елді мекен ішінде 10 қала атмосфералық ауаның жоғары ластану деңгейіне жатады. Олар: Нұр-Сұлтан, Алматы, Қарағанды, Теміртау, Атырау, Ақтөбе, Өскемен, Балқаш, Жезқазған және Шымкент қалалары. Сонымен қатар, ластаушы заттар шығындылар көлемінің едәуір көлемі Павлодар облысына тиесілі", - деді экология министрі.