Бір үйден шыққан қос спортшы: Шымкент халқы әлем чемпиондарын қалай қарсы алды?

Шымкент әуежайы қуанышқа толды. Бокстан әлем чемпионы атағын алған спортшылар туған жеріне оралды. Жеті алтынмен топ жарған Қазақстан құрамасының мақтанышы, ағайынды Сабырхандарды жанкүйерлер ерекше ықыласпен қарсы алды, деп хабарлайды Orda.kz. 

World Boxing аясында өткен ересектер арасындағы алғашқы әлем чемпионатында Қазақстан құрамасы жарқырады. Жеті алтын, бір күміс және екі қола медаль иеленді. Нәтижесінде жалпы командалық есепте бірінші орынға шықты.  

Жеңімпаздардың арасында Шымкенттің ерекше мақтанышы – ағайынды Сабырхандар бар. 

Спортшыларды қарсы алуға қала басшылығы, жаттықтырушылар, туыстары мен ондаған жанкүйер келді.

Махмұд Сабырхан жерлестеріне қолдау білдіргендері үшін алғысын білдіріп, алдағы жоспары жайлы айтты:

«Көп рақмет! Бірақ біз мұнымен тоқтап қалмаймыз, арқаны кеңге салмаймыз. Алдымызда Азия ойындары мен кезекті әлем чемпионаты күтіп тұр. Ол 2027 жылы Астанада өтеді, біз ағам екеуміз Қазақстан құрамасымен бірге бірінші орынды алуды мақсат етіп отырмыз. Қазір екеуміз де әлем чемпионы атандық, келесі мақсат – Олимпиада. Бір отбасыдан қос Олимпиада чемпионы шықсын дейміз», – деді ол.

Бауырларды дайындаған бапкер Ілияс Оралбеков те команданың алдында әлі талай биік шыңдар тұрғанын айтты. Жақын күндері қазақстандық боксшыларды Әлем кубогы, Азия чемпионаты және 2026 жылы Нагояда өтетін жазғы Азия ойындары күтіп тұр.