Білім министрлігі оқушылардың ақылы конкурстарға қатысуына қарсылық білдірді

Ақылы олимпиадалардан алынған дипломдар мен сертификаттар, сондай-ақ сатып алынған марапаттар еш жерде есепке алынбайды, деп ескертті Білім және ғылым министрлігі.

Білім вице-министрі Шолпан Каринова мектептер мен мұғалімдердің өздері ақылы олимпиадаларға қатысуға шақырылатынын және бұл дұрыс емес екенін атап өтті.

«Бірде-бір мұғалім, бірде-бір мектеп оқушыларына үшінші тұлғалар ұсынатын әр түрлі олимпиадалар мен жарыстарға қатысуға рұқсат бермеуі керек. Бұл мектеп оқушыларының нақты жұмысын бағалау емес, марапаттарды сатып алу: ақша төлеп, журналға есімдеріңізді енгізіп, диплом алу», - деді Шолпан Каринова.

Ол соңғы бір жыл ішінде ақылы олимпиадалар мен жарыстарға қатысушылар саны артқанын атап өтті. Сонымен қатар, білім министрлігі мұндай бастамаларды үзілді-кесілді қолдамайды. Білім саласындағы барлық зияткерлік, спорттық, шығармашылық жарыстар министрліктің бұйрығы негізінде ресми түрде өткізіледі.

Білім министрі Асхат Аймағамбетов бүгінде мұғалімдер көбінесе марапатқа ақша төлейтінін, олардың сыртқы белгілері ресми айырым белгілеріне ұқсас екенін атап өтті.

«Біз бұл мәселені бірнеше рет көтердік, бірақ мұндай марапаттарға ие болғысы келетіндердің саны азаймай отыр», - дейді Білім және ғылым министрлігінің басшысы.

Шолпан Каринова мұғалімдердің награда сатып алуы педагогикалық әдепке сәйкес келмейтіндігін көрсетті. Ол білім беру саласының қызметкерлерін марапаттау мәселесі арнайы комиссиямен шешілетінін, наградалар алу мен марапаттау тәртібі заңмен бекітілгенін түсіндірді.

«Бұл наградалардың барлығының заңды күші жоқ. Мектептерде және басқа оқу орындарында мұғалімдерге осындай ақылы марапаттарды беруді ресми түрде тоқтату қажет», - деді вице-министр.