Қазақстанда бағаны аспандатқан жанармай бекеттері анықталды

ҚР Бәсекелестікті қорғау және дамыту агенттігінің төрағасы Серік Жұманғарин жанар-жағармай бағасын шарықтататын жанармай құю стансалары желілерін атады.

Ол Қазақстанда 180 күн ішінде мұнай өнімдерін бөлшек саудада өткізуге шекті бағалар белгіленгенін еске салды. Дегенмен, жанар-жағармайды Энергетика министрлігі белгілеген бағадан жоғары бағаға сататын нарық қатысушылары бар.

«Дизельдік отын нарығында бөлшек саудамен айналысатындарға қатысты 12 тексеру жүргізіліп жатыр. Оның ішінде төрт ірі – «Гелиос» ЖШС, «Sinooil» ЖШС, «Газпромнефть-Қазақстан» ЖШС, « PetroRetail» ЖШС жанармай құю бекеттері бар» деді бөлім басшысы үкімет отырысында.

Сондай-ақ Бас прокуратурамен бірлесіп ТМД елдерінің 6 көтерме дистрибьюторына («Қазмұнайгаз» АҚ, «Petrosun» ЖШС, «СНПС-Ақтөбемұнайгаз» АҚ, «Қазгермұнай» БК» ЖШС, «Қазақойл Ақтөбе» ЖШС және «ҚазГПЗ» ЖШС) монополиялық жоғары бағаларды белгілеу тұрғысынан үстем жағдайды теріс пайдалану фактісі бойынша тергеу амалдары тағайындалды. Сонымен қатар, сұйылтылған газ сататын 180 саудагердің ісі тексерілуде.

Жұманғариннің айтуынша, тергеудің алдын ала қорытындысы бағаның көтерілуіне электронды сауда алаңындағы баға белгілеу механизмінің жетілмегендігі басты себеп болғанын көрсетті.

Еске салсақ, Қазақстанда жанармай құю бекеттерінде көліктерге жанармай құю үшін сұйытылған мұнай газын бөлшек саудада өткізуге шекті бағалар 180 күнге белгіленген. Атап айтқанда, мұндай жанармайдың бағасы аймаққа байланысты литріне 50 теңгеден (11 цент) 75 теңгеге (17 цент) дейін болмақ. Сұйытылған мұнай газын электронды сауда алаңы арқылы сатуға толық көшу бір жылға шегерілді.

Бензин мен дизель отынының бағасы сауда маркасы мен аймағына байланысты және литріне 89 теңгеден (22 цент) 215 теңгеге (49 цент) дейін, дизельдік отын үшін 230 теңгеден (53 цент) 260 теңгеге (60) дейін болып бекітілген.