Атырау облысында «Блогерлік тексеру» деп қорқытып, қомақты қаражат сұраған белсенді ұсталды 

29 қазанда аймақтағы жол құрылысымен айналысатын компанияның қызметкері полицияға жүгінді. Ол өзін блогер және азаматтық белсенді деп атаған белгісіз адам 30 миллион теңге талап еткенін хабарлады Orda.kz.

Жол компаниясының қызметкері полицияға күдіктінің оған психологиялық тұрғыдан қысым жасап, егер ақша болмаса, әлеуметтік желіге кәсіпорынның іскерлік беделіне нұқсан келтіретін материалдарды жариялайтынын айтып, қорқытқанын мәлімдеді.

Атырау облысы полиция департаментінің мәліметінше, бопсалаушы 1982 жылы туған ер адам болып шықты. ҚР ҚК 194-б. 3-б. 2-т. («Ірі мөлшерде жасалған қорқытып алушылық») бойынша қылмыстық іс қозғалды.

Сотқа дейінгі тергеу жалғасуда, ол ПД басшылығының бақылауында.

Екі күн бұрын ғана Шымкентте әкімдік қызметкерін бопсалап, 10 млн теңге сұраған күдікті блогер-журналист қамауға алынды. Сондай-ақ, Ресейде блогер, бизнес-коуч Аяз Шабутдинов курс сатып алаяқтық әрекетке барғаны үшін сотталды.