Әскерде жүрген Нұргелді Байыш есімді тағы бір сарбаз жындыханаға түсті

Маңғыстау облысының Бейнеу ауданындағы 99116 әскери бөлімінде қызмет еткен Нұргелді Байыш есімді тағы бір сарбаз қазір психикалық орталықта жатыр, деп хабарлайды Orda.kz. 

Анасы Жарқынай Лұқпанова сап-сау әскерге аттандырған ұлын не себепті бес айдан соң «жеке тұлғаның бөлінуі» диагнозымен қайтарғанын түсіне алмай отыр.

«18–19 жасқа дейін дені сау болып келген баламыздың бірнеше айда осындай ауруға ұшырауы ақылға қонбайды. Бұл оның болашағына балта шабу», – дейді ол.

Дәрігерлер үш сарбазды бақылауда қалдырып, қалған төртеуіне психикалық ауытқу белгілеріне байланысты анықтама беріп, ата-аналарымен бірге үйлеріне жіберген. 

«Жекелеген жарияланымдарда таратылған жеті әскери қызметшінің өз-өзіне қол жұмсауға бейім мінез-құлық танытқаны жөніндегі ақпарат шындыққа сәйкес келмейді. Қазіргі уақытта медициналық мекемеге әскери борышын өтеп жатқан үш сарбаз жатқызылған, олардың тарапынан өз-өзіне қол жұмсауға бейімділік әрекеттері байқалған», – дейді Қорғаныс министрлігі.

Еске сала кетсек, Маңғыстау облысында 18 жастағы Сұлтан Шынтеміров те жындыханаға түсті. Анасының айтуынша, сарбаз әскерде әлімжеттік көрген соң, бірнеше рет өз-өзіне қол салуға оқталған. Әскери бөлімнің қызметкерлері жағдайды тексерудің орнына жауынгерді психикалық орталыққа жатқызып, істі жылы жабуға тырысқан.