Арыста кезекші дәрігер шырт ұйқыда жатқанда 4 жасар бала өліп қала жаздады

Арыста төрт жасар Әлирахман Сейтханның ата-анасы ұлының кезекші дәрігердің немқұрайлылығының кесірінен жансақтау бөліміне түскенін айтты. Олардың айтуынша, бала аурумен арпалысып жатқанда кезекші дәрігер шырт ұйқыда болған, деп хабарлайды Orda.kz.

Арыс тұрғыны Ұлжалғас Жүзейдің мәліметінше, бір апта бұрын оның ұлының қызуы көтерілген. Түнде, сағат шамамен үштерде баланың денесі қатты құрысады. Анасы дереу жедел жәрдем шақырып, баланы ауруханаға әкеледі.

Ұлжалғас Жүзей оларды медбике қабылдағанын, бірақ үйге қайтарып жібергісі келгенін айтты. Кейін бала кезекші дәрігер ауысқан кезде, яғни таңғы тоғызда ғана қаралады. Осы кезде бала есінен танып қалған. Содан бері ол жансақтау бөлімінде жатыр екен.

Анасының айтуынша, дәрігерлер дәл не болғанын әлі білмейді. Ал ата-ана ауруханада қажетті құрал-жабдықтар жоғын мәлімдеді. 

Белгілі болғандай, Арыс ауруханасында МРТ аппараты да, компьютерлік томограф та жоқ. Диагноз қою мүмкін емес. Ал дәрігерлер баланы облыс орталығына апаруға қорқады. Бала жолды көтере алмауы мүмкін. 

Аурухананың бас дәрігері Марат Төлегенов Ұлжалғас Жүзейдің айтқанын жоққа шығарды.

Айта кетейік, аттың жалына байлап сүйреген Айзаттың өлімін тергеу «кездейсоқ жағдай» деп атады.