Арабтар Трампты шашын жайған қыздармен қарсы алды: Ролик танымал болды

15 мамырда АҚШ президенті Біріккен Араб Әмірліктеріне ресми сапармен келді. Абу-Дабиде оны Еуропа жұртшылығын қатты таңғалдырған ерекше билеу рәсімімен қарсы алды, деп хабарлайды Orda.kz.       

Ақ киім киген қыздар екі қатарға тізіліп тұрып ұлттық аспаптардың сүйемелдеуімен ұзын шаштарын әуен ырғағымен серпіп, АҚШ президентін «шаш желпуімен» қарсы алды.

Көпшілікті биден бұрын араб қыздарының бөтен ер-азаматтардың алдында жалаңбас тұрғаны таңғалдырды. Ролик астына кейбір оқырмандар «арабтар бүркенуді қазақ қыздарына беріп, өздері жалаңаштана бастаған ба?» деп жазды. 

«Бақсақ – бақа екен» демекші. Бұл арулар «халиджи» деп аталатын дәстүрлі араб биін билепті. Бұл би Парсы шығанағы аймағында пайда болған, сондықтан атауы да соған сәйкес. «Халиджи» араб тілінен аударғанда – «шығанаққа тән», «шығанақтық» деген мағына береді. Қыздардың қимылдары теңіз самалын тамашалау сезімін жеткізеді деп есептеледі.

Бастапқыда халиджи тек әйелдер ортасында орындалатын би болған. Кейінірек оны жоғары мәртебелі қонақтарды қарсы алу кезінде, тойларда орындау дәстүрге айналған. Шариғат талаптарын айналып өту үшін бұл биді көбіне 12 жасқа толмаған қыздар орындайды, сондықтан олар орамалсыз болады.

Қазіргі таңда халиджи биін ер адамдар да орындайды. Ерлер нұсқасында таяқ немесе түрлі қару түріндегі аксессуарлар қолданылады.

Жергілікті БАҚ-тың хабарлауынша, бұл — жоғары дәрежелі қонақты салтанатты қарсы алу  дәстүрі,  оның негізгі бөліктерінің бірі — халиджи биі.

Айта кету керек, Трамптың жүзінен экзотикалық көрініске ерекше риза болғаны байқалды.