Антикор «Атамекеннің» экс-басшысы Мырзахметовке қатысты мәлімдеме жасады

Қазақстанның сыбайлас жемқорлыққа қарсы агенттігі Абылай Мырзахметовтің 7 млрд теңгені мемлекетке қайтарғанын мәлімдеді, деп хабарлайды Orda.kz.

Тиісті мәлімдеме агенттіктің Telegram-арнасында жарияланды.

«Мемлекет басшысының тапсырмасын орындау мақсатында ҚР Сыбайлас жемқорлыққа қарсы іс-қимыл агенттігі заңсыз алынған мүлікті қайтару бойынша тұрақты жұмыс жүргізуде. Қазіргі уақытта «Атамекен» Ұлттық кәсіпкерлер палатасының бұрынғы төрағасы А.Мырзахметовке қатысты сотқа дейінгі тергеп-тексеру деректері бойынша заңсыз жолмен алынған 7 млрд теңге көлеміндегі қаражат мемлекет кірісіне қосылды», деп мәлімдеді Антикор.

Жалпы, Сыбайлас жемқорлыққа қарсы қызметтің мәліметінше биылғы жылдың басынан бері аяқталған қылмыстық істер бойынша мемлекетке «шамамен 195 миллиард теңге өтелді».

«Соңғы 2,5 жылда олигополияларды қоса алғанда, Қазақстан халқына 1,09 триллион теңге қайтарылды. Бұл бағыттағы жұмыс жалғасуда және ерекше бақылауда», деп қосты Антикор. 

Абылай Мырзахметов 2022 жылдың ақпанында «Атамекен» ҰКП басқарма төрағасы қызметінен кетті. Бұл туралы ол Ұлттық палатаның кезектен тыс IX съезінде өзіне қатысты айтылған сынмен келісе отырып, жариялаған болатын.

2023 жылдың 10 мамырында «Атамекен» Ұлттық кәсіпкерлер палатасының экс-басшысы ірі көлемде пара алды деген айыппен ұсталды. 13 мамырда Астананың қылмыстық істер жөніндегі мамандандырылған ауданаралық соты «Атамекен» ҰКП-ның бұрынғы басшысы Абылай Мырзахметовті аса ірі көлемде алаяқтық жасады деп айыптап, бес жылға бас бостандығынан айырды.