Алматылық «Қайрат» «Реал Мадридтен» 0:5 есебімен ұтылды

Алматылық «Қайрат» өз алаңында мадридтік «Реалдың» қарқынын тоқтата алмай, Чемпиондар лигасының екінші турында 0:5 есебімен жеңілді, деп хабарлайды Orda.kz.

Килиан Мбаппе хет-трик жасап, алаң иелерінің қақпасына үш доп соқты. Төртінші голды Эдуарду Камавинга еншілесе, қосымша уақытта есепті Браим Диас түйіндеді.

«Қайраттың» жұлдызды 18 жастағы қақпашысы Шерхан Қалмұрза көптеген қауіпті сәттерден алып шықса да, сәттілік бізге серік болмады. Ірі есепке қарамастан, жас голкипер бірнеше қауіпті соққыларды қайтара алып, командасын қиын жағдайдан құтқарып, жиналған жұршылықтың қошеметіне бөленді.

Алғашқы турда «Реал» «Марсельді» 2:1 есебімен ұтса, алматылықтар «Спортингке» 1:4 есебімен есе жіберген еді. Келесі ойындар: 22 қазанда мадридтіктер «Ювентуспен», ал «Қайрат» 21 қазанда кипрлік «Пафоспен» кездеседі.