Алматыда заңгер Әділетхан Молдахан ұсталды

Атышулы Әл-Фараби даңғылындағы көлік апаты туралы резонанс істе жарияланымдар жасаған заңгер Әділетхан Молдахан ұсталды, деп хабарлайды Orda.kz.

Бұл туралы ақпаратты оның әріптесі Нұртуған Өмірзақ өзінің Instagram-дағы парақшасына жариялады.

«Түнгі сағат 23:45 біз департаменттің алдында тұрмыз. Әл-Фараби көшесіндегі көлік апаты туралы қорықпай, басын сұғып шындықты айтқан Әділетхан бауырымды департаментке жауап аламыз деп шақырып, кейін оны қамап тастады. Біз адвокаттық куәлігімізді көрсетсек те, ешқандай түсініктеме бермей, оны қорғау құқығын шектей отырып бізді ішке кіргізбей отыр», – деді Нұртуған Өмірзақ. 

Айта кетейік, Алматыдағы Әл-Фараби даңғылында қайғылы оқиға болып, 3 адам сол жерде тіл тартпай кеткен еді. Полиция қызметкерлерінің бұл іске қатысы бар-жоғын бірінші болып заңгер Әділетхан Молдахан айтқан еді. Өз сөзінде ол сол түні Zeekr және тағы бірнеше көлік Достық даңғылынан бастап жарыс ұйымдастырғанын ашық көрсетті. Оның мәліметінше, көліктер әл-Фараби бойынша сағатына 250 км жылдамдықпен жүріп, қос тұтас жолды кесіп өтіп, жалған нөмірлерді пайдаланған делінді. Сондай-ақ, Молдахан арасында жоғары лауазымды полиция қызметкеріне тиесілі көлік болуы мүмкін екенін айтты. 

Оқи отырыңыз:

• Тоқаев ұлттық қауіпсіздік стратегиясы жобасын мақұлдады
• Ұлттық, діни және әлеуметтік алауыздық. Бас прокуратура үндеу жасады
• Ресейдің Усть-Луга вахталық кентіндегі төбелесте 10 қазақстандық ұсталып, үшеуіне қатысты тергеу басталды