Алматыда Құрбан айт мейрамы қалай тойланады? – Бекшин

Қаланың бас санитарлық дәрігері Жандарбек Бекшин Алматыда Құрбан айт мейрамы қалай ұйымдастырылатынын айтты.

Бұл туралы Orda.kz хабарлады.

Брифингте Бекшин биыл Құрбан айт мерекесін өткізу бұрынғы форматта, яғни онлайн режимде өтетіндігін алға тартты.

– Өткен жылы біз алғаш рет онлайн-құрбан айт мейрамын өткіздік. Тәжірибе көрсеткендей, садақаны да, құрбандық шалуды да онлайн өткізуге болады. Qurban-2021 сайты бойынша садақа не құрбандық шалуға қаражат жіберуге мүмкіндік бар. Құрбандыққа шалынатын мал Алматы облысы Қарасай ауданыдағы арнайы жерде сойылады, - деді Бекшин.

Бас дәрігердің айтуынша, биыл барлық іс-шаралар жоғары деңгейде өтуі үшін Дін істері басқармасы және мүфтиятпен қосымша кездесу өткізіледі.

Еске салсақ, Құрбан айт мерекесі 20 шілдеге келіп тұр.

Өткен жылы мереке басталмай тұрып Алматыға кіре берісте полиция бекеттері қойылып, малдың әкелінуін болдыртпаған.