Алматыда кішкентай баланы жерге лақтырған жасөспірімнің үстінен қылмыстық іс қозғалды

Алматыда көшеде ойнап жүрген екі жасар баланы жерге лақтырып жіберген 13 жастағы жасөспірімге қатысты қылмыстық іс қозғалды, деп хабарлайды Orda.kz.

Алматы қаласының балалар уәкілі Диана Ерланның айтуынша, іс 107-бап («Денсаулыққа қасақана орташа ауырлықтағы зиян келтіру») бойынша қозғалды.

Оқиға 23 тамызда тұрғын үйлердің бірінің ауласында болған. Жерге қатты құлаған баланың қолы сынған.

«Мен балалардың ата-аналарымен байланыстамын. Оларға психологиялық көмек көрсетілді. Жәбірленуші тарапқа медициналық қолдау көрсетілді, әрі қарай оңалту орталығында тексеріледі. Бала үйде, ата-анасымен бірге. 13 жастағы жасөспірім де ата-анасымен өз үйінде», – деді Диана Ерлан.

Сонымен қатар, уәкіл қоғамнан заңды өкілдердің келісімінсіз балалардың суретін таратпауды сұрады.