Қардың қалың жаууына байланысты Алматы полициясы жол қозғалысына қатысушыларды қырағылық пен сақтыққа шақырады, деп хабарлайды ORDA.

Ауа-райының нашарлауына байланысты Алматы қаласының полиция басқармасы жол ережелерін және қауіпсіздік шараларын қатаң сақтауды еске салады.

«Түнгі сағат үштен бастап мегаполисте 70-тен астам жол-көлік оқиғасы орын алды, оның алтауында зардап шегушілер бар. Жауын-шашынның көп болуы қаладағы жол жағдайын едәуір қиындататыны анық: кептеліс бар, көліктердің өткізу қабілеті нашарлайды. Бірақ, тәжірибе көрсетіп отырғандай, көбінесе бұған жол қозғалысына қатысушылардың тәртіп сақтамауы әсер етеді: кейбір жүргізушілер жылдамдықты төмендетпейді, төтенше жағдайларға тап болады, қауіпті маневр жасайды, бір-бірін сыйламайды, жаяу жүргіншілер жолды рұқсат етілмеген жерден кесіп өтеді. Бұл факторлар жиынтығы жалпы жол жағдайына кері әсер етеді», – деді Алматы қалалық полиция департаменті әкімшілік полиция бөлімінің бастығы Жандос Мұраталиев.