Алматыда 112 азаматты алдаған алаяқ қалайша рақымшылыққа ілінді?

Бостандық ауданы №2 сотында 112 адамды тақырға отырғызған алаяққа үкім шықты. Сот оны кінәлі деп танып, жеті жылға бас бостандығынан айырды. Алайда, сотталушы рақымшылыққа ілініп, жазасы қысқартылып шыға келді, деп хабарлайды Orda.kz. 

Сот бастапқыда айыпталушыны кінәлі деп танып, жеті жылға бас бостандығынан айырды. Алайда, конституциясының 30 жылдығына орай жарияланған рақымшылық туралы заңға сәйкес, жаза мерзімі 1/5 бөлігіне қысқартылып, түпкілікті бес жыл жеті ай алты күнге бас бостандығынан айыру жазасы тағайындалды. 

«Жазаны жеңілдететін мән-жай ретінде 112 жәбірленушінің жетеуіне келтірілген шығынды ішінара өтеуі есепке алынды. Ауырлататын мән-жайлар анықталған жоқ. Азаматтық талап-арыздар толық қанағаттандырылып, айыпталушыдан жәбірленушілердің пайдасына 168 миллион теңгеден астам қаржы өндірілді»,  деп хабарлады сәрсенбі күні жоғарғы соттың баспасөз қызметі. 

Сотта анықтағандай, айыпталушы оқу орталығын ұйымдастырып, басқарған. Интернеттегі агрессивті жарнама мен балаларды шетелдік ЖОО-ларға 100% түсіреміз деп уәдені үйіп-төкен. Сондай-ақ, Foundation бағдарламасы бойынша өз елінде оқытамыз деген желеумен 112 азаматты алдап, 168 миллион теңгеден астам қаражат жинаған.