Алматы облысының тұрғындары Ұйғыр ауданының атауын өзгертуді талап етті

Олар өңірдің бұрынғы әкімі Амандық Баталовтың уәдесін орындауды талап етеді.

Әлеуметтік желілерде Алматы облысының Кепебұлақ ауылының тұрғындары Президент Қасым-Жомарт Тоқаевқа видео хабарлама жолдады. Жергілікті тұрғындар Ұйғыр ауданына қазақша атау беруді талап етеді.

— Біздің мақсатымыз екі халық арасындағы алауыздық тудыру емес. Біз әкім Амандық Баталов берген уәденің орындалғанын қалаймыз. Біз Масанчидегі жағдайды қайталағымыз келмейді,- дейді ауыл тұрғындары.

Аудан атауын өзгертуден басқа, тұрғындар Ақтам, Добын және Ардолайты ауылдарына қазақ аттарын беруді сұрайды.

— Аудан әкімі Шухрат Нұрахуновтан осы мәселені шешуге қолдау көрсетуін сұраймыз. Олар комиссия құрып, бір ай ішінде жауап берсін,- деді аудан тұрғындары.

Алматы облысындағы Ұйғыр ауданының атауын өзгерту мәселесі жыл сайын көтеріліп келеді. Өткен жылы аймақтың бұрынғы басшысы Амандық Баталов халық санағы аяқталғанша атауды өзгертуге болмайтынын айтқан.