Алматы – Бішкек тас жолындағы апат: 8 адам қаза тауып, 2 адам ауруханаға жеткізілді

Алматы облысында Lexus және Toyota Alphard автокөлігі апатқа ұшырап, 8 жолаушы қаза тапты, деп хабарлайды Orda.kz.

Алматы–Бішкек автожолының 107-ші километрінде болған жол-көлік оқиғасы бойынша полиция қызметкерлері алдын ала тергеу жүргізіп жатыр.

«Алдын ала мәліметке сәйкес, Lexus автокөлігі қарсы жолаққа шығып, Toyota Alphard автокөлігіне соғылған. Оқиға орнында алған жарақаттарынан 8 адам көз жұмды, 2 адам ауруханаға жеткізілді», — деп мәлімдеді полиция.

Қазіргі уақытта оқиғаның барлық мән-жайын анықтау үшін қажетті тергеу шаралары жүргізіліп жатыр. Полиция жүргізушілерге жол қозғалысы ережесін қатаң сақтауды және жолда аса мұқият болуды сұрайды.