Алматы әуежайында Lufthansa ұшағына жанармай көлігі соғылды

Алматы әуежайында жанармай тасымалдайтын көлік тұрақтан шыққан сәтте Lufthansa әуекомпаниясының ұшағының қозғалтқышына соғылды, деп хабарлайды Orda.kz.

13 қазанға қараған түні Алматы – Астана бағытына ұшқан Airbus A340 ұшағының қозғалтқышы зақымданды. Әуежайдың баспасөз қызметінің мәліметінше, инженерлер әуе кемесін дереу тексеріп, қозғалтқыш қақпағынан сызаттар анықтаған. Тексерістен кейін ұшақ кесте бойынша ұшқан. 

«Қазір әуежайдың ұшу қауіпсіздігі департаменті оқиғаға қатысты егжей-тегжейіне дейін тергеу жүргізіп жатыр», деп жауап берді әуежайдың баспасөз қызметі.

Еске салайық, 11 қазанда Қостанай әуежайында Астанаға бағыт алған Qazaq Air әуе компаниясының ұшағының дөңгелегі ұшып бара жатқанда  жанып кеткен еді.