Ақмола облысында балық қырылды, спирт зауытына айыппұл салынды

Ақмола облысында балықтың қырылуына себеп болған спирт зауытына 21 млн теңге айыппұл салынды, олар өзенге ағынды су төккен, деп хабарлайды Orda.kz. 

Ақмола облысында Айдабұлақ өзеніндегі жаппай балық қырылуына кінәлі мекеме анықталды. Ол жергілікті спирт өндіретін зауыт болып шықты.

Ақпан айының басында тұрғындар өзен суының түсі өзгеріп, жағымсыз иіс шыға бастағанын, ал су бетінде өлі балықтар пайда болғанын байқаған. Тексеруге келген экологтар зауыттан өзенге лас су ағызып жатқан құбырды тапты.

Кәсіпорын өкілдері бұл жағдайды абайсыздық деп түсіндіріп, «біреу ысырманы толық жаппаған» деп ақталды.

Сараптама нәтижелері судың балықтардың қырылуына себеп болған химиялық заттармен қатты ластанғанын көрсетті.

Зауытқа 21,3 миллион теңге көлемінде айыппұл салынып, барлық заңбұзушылықты жою туралы қатаң нұсқама берілді.

Экологтар кәсіпорынның ағынды суды төгуін толық тоқтатып, табиғатқа зиян келтірудің қайталанбауын жеке бақылауға алатынын мәлімдеді.

Оқи отырыңыз: 

• Атырау облысында жаппай балық қырылды
• Экологтар СҚО су қоймаларындағы балықтардың қырылу себебін атады