Әкежан Қажыгелдин Қазақстанға жасырын келгенін айтты

Қазақстанның бұрынғы премьер-министрі Әкежан Қажыгелдин 2007 жылы әкесінің қазасына байланысты елге жасырын келгенін мәлімдеді, деп хабарлайды Orda.kz.

Азаттық радиосына берген сұхбатында ол сол кезде Қырғызстан мен Ресейдің көмегімен Қазақстанға кіріп, әкесін соңғы сапарға шығарып садып, түнде қайта Еуропаға ұшып кеткенін айтты.

«Қырғызстан мен Ресей көмек көрсетіп, жасырын барып, өзімнің қызметімді атқарып, түнделетіп Ресей арқылы қайта Еуропаға ұшып кеттім», — деді Қажыгелдин.

Саясаткер кейін бірнеше рет бұрынғы ҰҚК төрағасы Нұртай Әбіқаймен сөйлескенін және елге кіруде ешқандай бақылау болмағанын атап өтті.

Қажыгелдин Қазақстан президенті Қасым-Жомарт Тоқаевқа ресми өтініш жолдамағанын және Қазақстандағы сот шешімін мойындамағанын айтты. Ол бұл шешімді АҚШ, Ұлыбритания, Франция, Германия мен Италия да мойындамағанын еске салды.

Сонымен қатар, саясаткер туған жерге деген сағынышын жасырмай, ана тілінде хат жазып, оқитынын, бірақ сөйлесуге әлі де жаттығу қажет екенін жеткізді.

«Алыста жүргенде ең бірінші өз тіліңді сағынасың», — деді Қажыгелдин.

Еске сала кетейік, Қасым-Жомарт Тоқаев Ресейдің «Российская газета» басылымына сұхбат беріп, тіл саясатына тоқталды.